Li canta del machin-segeros.[]
ex: 'Un Libre Blu' de August Strindberg
Quande Damascenus migrat in li land del torturada, il venit till un segería, ú un supra percusset rota eat vacuimen. Ma exteriori che li bord del fluviette sidet du mannes e segat con un seg un stal-rel. Illi accompaniat su segada per un cantada in prosa per du voces, simileant a un querell de trincardes.
- De quo Vu canta? questionat Damascenus.
- De Crede e Saventie, respondet li ún.
E tande illi comensat cantar:
- Quo yo save, to yo crede, ergo subsumma se li saventie sub li crede, e li crede sta súper.
- Quo es, quo tu save? To, quel tu videt per tu ocul.
- Mi ocul vide null cos per se self, nam si tu exrupte it e mette it ci, it vide necos. Ergo it es mi interiori ocul, quel vide.
- Esque yo posse dunc vider tu interiori ocul?
- It ne es visibil; ma per to, quel ne es visibil, tu vide. Ergo tu deve creder ye lu ínvisibil, nu tu save.
- Yes yes yes yes, ma ma ma ma … esque tu videt Deo?
- Yes, per mi interiori ocul, pro to yo crede ye Il. Ma tu ne besona har videt Le por que yo crede ye Il
- Ma li saventie es lu max superiori.
- Yes, ma li crede es lu absolut max superiori.
- Esque tu save, quo tu crede?
- Yes, e malgré to, que tu ne save it.
- Pruva to!
- Per du concordant attestantes? Yo posse collecter du milliones de attestantes solmen ci in ti land; to vell esser un plen pruva, por te.
- Ma ma ma ma. . .
Et cetera.
- trad. Sebastian Hartwig