FANDOM


(Articulo del serie: IN LE FUTURO)

per Watson Davis

Energia es necessari pro toto que occurre in le mundo. In tempores passate le plus grande parte del energia applicate esseva fornite per le fortia muscular del homines e del animales domestic.

Hodie carbon, petroleo, aqua, e ligno nos da le grosso del fortia motor. Vostre musculos e mies es exempte de labor nimis dur.

Fundamentalmente tote le energia de nostre terra veni del sol. Le calor e le lumine del sol -- octo minutas distante de nos in tempore de viage del radiation -- es cosa vital.

Tote carbon e tote petroleo es lumine fossilisate del sol. Nos vive del energia immagazinate de eras passate. Nos expende extraordinari richessas accumulate eones ante que nostre ultime atavos comenciava evolver. Si nos non habeva tanto de illos, omne pecia de carbon e omne gutta de petroleo esserea como tante auro o uranium. Illos es irrenovabile.

Le energia que nos cape per subjugar le cadita de aqua retenite per grande deas, es le production de iste anno. Ita etiam le ligno que nos arde usa un lumine sola relativemente recente, un energia solar que ha un etate de solo alicun annos. Le energia del homine veni del calorias de nostre alimento usualmente crescite solo alicun menses retro.

Per via experimental le fission del uranium --como in le bomba atomic -- ha aperite un nove fundo de energia item irrenovabile e extremente limitate malgrado le facto que un libra de materia integralmente convertite in energia fornirea tote le fortia electric del Statos Unite de America pro quasi un mense.

Nos certo non es al bordo penose de un carentia de energia sed un reguardo al futuro deberea inquietar nos pro le amor de nostre infantes.

Le carbon e le petroleo es si preciose a causa del substantias chimic que illos contine que il esserea logic de prohibir arder los pro obtener fortia motor. Nos prepara aperir le grande depositos de schistos petroleofere.

Nostre uso del importationes currente del lumine que le sol infunde super nos, es pietosemente inefficace. Le campos e silvas usa somente un parve fraction del radiation que illos recipe. Sed nos non pote mesmo construer un fabrica si efficace como le folio verde.

Nos indige un tanto vigorose effortio de recerca super le energia pro le futuro como lo a que le germanos nos fortiava in le disveloppamento del energia atomic. Nos deberea consecrar a illo un milliardo de dollares e dece mille del melior cerebros. Nos debe:

A. Discoperir le secreto del folio verde (photosynthese) e refacer lo chimicamente e mechanicamente con efficacia real.

B. Cercar plantas, sia algas sia alteres, que pote melio capturar le lumine solar pro alimentos, productos chimic, e materias de combustion.

C. Reexplorar le fortia motor veniente del differentias de temperatura in le oceano, del fluxo e refluxo, del sufflo del ventos, e del calor directe del lumine solar. Risos del vangloriose exploitatores de nostre amplissime provision de energia non deberea discoragiar nos.

D. Studiar le sol e le stellas per trovar nove directivas concernente le conversion de materia in energia, nam illo es lo que provide de combustibile iste corpores flammante.

E. Trovar elementos, ultra uranium e thorium, que contine usabile energia nucleari.

_______

  • Traducite del texto original anglese (Science News Letter, 1950, 13 p. 199) per Eric Berger

Ad blocker interference detected!


Wikia is a free-to-use site that makes money from advertising. We have a modified experience for viewers using ad blockers

Wikia is not accessible if you’ve made further modifications. Remove the custom ad blocker rule(s) and the page will load as expected.